在一個文物展覽中遇上楊鐵樑爵士。之前聽說，楊爵士近年甚少參與舊生活動，不想數天之後有幸親見其人。儘管其身邊好友如群星拱列，我這無名小子也不管身份懸殊，趁其他賓客談話間稍稍停頓之際，立即上前攀談。
仍然活躍的戰前港大舊生已經不多了，像楊爵士這般舉足輕重的人物，更如鳳毛麟角。楊爵士雖然祖籍廣東，其祖父卻是晚清上海太古洋行總買辦(Comprador)，自小在上海受教育。受業於聖約翰中學，後來因為國共內戰，來到香港大學唸書，也不知道有心還是無意，所住的宿舍又是聖公會的聖約翰學院，然後才負笈英倫。
很早以前就聽聞楊官寡言，唐突上前之剎那，有點擔心會否交談三句即告dead air。誰知大仙聽明白是細仙求見，久違了的話匣子馬上打開，倒也滔滔不絕（信我，跟大仙聊天時以敍舊開始，除非閣下口才太差，否則一般沒有冷場）。一發話，說的竟然是當年自已的糗事：
「當年呢，我同我二哥因為大陸打仗，走黎港大讀書，咁就住St. John’s啦。我地就明知當年有ragging，新人一定被senior玩。有一晚兩點半（連時間都記得，看來真是刻骨銘心），我同我哥哥被叫醒左，大仙叫我地兩個輪流入一間房。我哥哥先入，點知唔到兩分鐘就出返黎。我心諗：『搞咩兩分鐘就玩完呢？』然後我就被人叫入去了。
「一入房間，但見幾個senior排排坐左係度。佢地叫我企係房中間，問我：『喂，你識唔識跳舞呀？』我話：『各位師兄，家下咁既時局，國難當前，我邊有心情學跳舞吖？』佢地再問：『咁即係識定唔識呀？』我話：『都識少少既。』其中一個就話：『咁跳番part黎睇下先啦！』我咪跳一個八拍俾佢地睇。
「跳到一半，佢地又嗌停，話：『得喇得喇！咁你識唔識唱歌呀？』我又話：『各位學長，家下咁既時局，國難當前，我邊有心情學唱歌吖？』佢地忍唔住就勞氣嘞：『夠啦夠啦，我地唔係要聽你講呢啲野呀！哎，都唔好玩既你，同我出番去！』結果我又唔到兩三分鐘俾人抨番出去。」
各位，事實證明，木訥寡言這回事，確實是三歲定八十。但當這故事由當事人親口複述，還是在一個非常正經的場合中，效果就非常搞笑。
現在大家都覺得，港大在本地不像當年盡收天下之利器，似乎黃金時代都在上世紀中期。大仙接著卻說：「你地而家就好喇，學校辦得咁好。我以前讀書個陣，都以為Hong Kong U好勁架，點知有一次我問我個澳洲Professor，你覺得Hong Kong U係間點既學校呀？佢竟然舉左幾間水水地既外國大學同我地比（當時他有列明的，可見記憶尤新，不過為存忠厚，姑且按下不表）。我當時心諗：『唔係卦？』不過而家排名去到咁前，乜都無所謂啦！」
大仙說，宿舍舊時在般咸道，不是現在的薄扶林道那邊，所以很少回去了。一老一少這麼一聊，倒也親切愉快。眼看開幕典禮要開始了，我也識趣自行告退。能夠跟這麼一位賢達長者交談，怎能不感到福緣深厚。
